Македонскиот фолк пејач Кире Науновски, кого публиката одлично го памети како победник на популарното музичко шоу „Никад није касно“, подготвува нов музички проект кој уште на прво слушање освојува со својата мелодија и впечатлив рефрен.
Станува збор за песната „Ти ќе бидеш моја“, композиција која според многумина ги има сите предуслови да стане еден од најголемите народни хитови во периодот што следува. Со емотивен текст, заразна мелодија и рефрен кој лесно се памети, песната е создадена да се пее на свадби, веселби, прослави и сите оние моменти кога музиката ги спојува луѓето.
Публиката веќе имаше можност да ја слушне песната на Роса Фест, каде што предизвика одлични реакции кај присутните. Многумина коментираат дека доколку фестивалот имаше натпреварувачки карактер и награди, токму оваа песна ќе беше еден од најсериозните кандидати за победа. Но, и без фестивалски признанија, „Ти ќе бидеш моја“ успеа да го привлече вниманието и да остави силен впечаток кај љубителите на македонската народна музика.
Во изминатиот период Кире Науновски беше активно ангажиран и на снимањето на видеоспотот за песната. Кадрите се реализирани во неговиот роден град Свети Николе, а според најавите, видеото ќе понуди помодерен визуелен пристап кој ќе ја надополни енергијата и современиот дух на композицијата.
За реализацијата на видеоспотот беше задолжена ЕИН Продукција, која и овојпат се погрижи песната да добие впечатлива и професионална визуелна приказна. Од продукцијата најавуваат дека сè е подготвено за големата промоција која се очекува во текот на следната недела.
Премиерното емитување на новиот спот за песната „Ти ќе бидеш моја“ ќе биде на Сателитската Телевизија ИН, по што видеото ќе стане достапно и за пошироката публика.
Судејќи според првите реакции, Кире Науновски повторно е на добар пат да ѝ подари на македонската публика уште една песна која долго ќе се слуша и пее, а „Ти ќе бидеш моја“ веќе сериозно се наметнува како еден од потенцијалните фолк хитови на годината.