Вечерва јавноста ја потресе тажната вест за ненадејната смрт на македонскиот музичар Дарко Станојков, човек кого многумина го опишуваат како редок виртуоз, искрен пријател и голем човек со уште поголемо срце.
Веста ја сподели Тања Тајчи Додева, позната како голем љубител и искрен поддржувач на македонската музика, која со емотивни зборови се прости од својот сограѓанин и пријател.
„Ах животе, суров ли си… и со неверување, како да се поверува. Тој не само што беше музичар, тој беше виртуоз, редок на естрадата, драг сограѓанин кој не знаеше да погреши ништо, туку со него можеше само да се смееш“, напиша Додева.
Таа додаде дека споменот за Дарко ќе остане вечен меѓу сите што го познавале:
„Вечно ќе те паметиме Дарко Мц Станојков, голем човеку, мој сограѓанин. Почивај во мир, слава ти.“
Пријатели, колеги и бројни познаници со неверување ја примаат оваа вест, простувајќи се од човек кој зад себе остави не само музика, туку и неизбришлива трага во срцата на луѓето.
Причината за смртта засега не е позната.
Македонската музичка сцена вечерва загуби уште едно големо име, а споменот за Дарко Станојков ќе продолжи да живее преку неговата музика, насмевката и добрината што ја оставаше каде и да се појавеше.