Македонската патриотска музика добива уште едно вистинско музичко бисерче. Познатите и омилени интерпретатори Тоше Ангелески и Бојана Јованова годинава се претставија на фестивалот на патриотски песни „Гоце Фест“ со нивната нова дуетска композиција насловена „Родени за песна“, песна која уште со првото слушање допира до срцето и ја буди љубовта кон татковината.
Песната носи силна емоционална порака за македонскиот народ, за корените, традицијата и љубовта кон родната земја. Токму затоа уште по нејзината фестивалска изведба доби бројни позитивни реакции од публиката и љубителите на патриотската музика.
Овие денови, Тоше и Бојана вредно работеа и на снимањето на видеоспотот за песната во продукција на ИН Продукција, а според првите информации, гледачите можат да очекуваат вистинско визуелно уживање исполнето со македонски дух, традиционални мотиви и прекрасни кадри.
Посебен белег на видеото му даваат и членовите на фолклорен ансамбл од Кичево, кои со својата игра, народни носии и енергија внесуваат дополнителна патриотска нота и ја доловуваат убавината на македонскиот фолклор и културно наследство.
Тоше Ангелески и Бојана Јованова уште еднаш покажуваат дека патриотската песна има посебно место во срцата на македонските изведувачи и дека преку музиката најубаво се чува и негува љубовта кон Македонија.
Ексклузивната премиера на видеоспотот за „Родени за песна“ ќе се случи наскоро на сателитската телевизија ИН, каде публиката прва ќе има можност да ужива во оваа музичка приказна која ветува да стане една од најслушаните патриотски песни оваа година.
„Родени за песна“ не е само музичка композиција – тоа е песна за душата, за традицијата и за вечната љубов кон Македонија. 🇲🇰