Денес, на само 48-годишна возраст, ненадејно почина познатиот македонски музичар Мустафа Сејфулов, кој последните години од својот живот ги помина во Виена, Австрија, заедно со своето семејство.
Роден на 26 јануари 1978 година во Кавадарци, Мустафа потекнуваше од вистинска музичка лоза. Неговиот дедо Муто Сејфулов беше познат свирач и кларинетист, татко му Рамадан Сејфулов музичар, а љубовта кон музиката ја продолжи и неговиот брат Веби Сејфулов. Музиката кај него не беше само професија – беше живот.
Во текот на својата кариера, Мустафа Сејфулов остави длабока трага на македонската естрада. Беше дел од групата „Кавадарка“, каде во 90-тите години настапуваше како тапанар, а подоцна и како пејач во обновената постава во 2000-тите. Со својата енергија и искреност на сцената, соработуваше со бројни познати македонски пејачи и групи.
Особено ќе остане запаметен како првиот изведувач на големиот хит „Големи маки тегневме“, песна која допре до срцата на многу генерации и остави неизбришлива трага во народната музика.
Неговата последна снимена песна е токму „Големи маки тегневме“, во соработка со Фазли Сејфулов и Александар Ѓорчевиќ – симболично заокружување на една богата музичка приказна.
Веста за неговата смрт ја споделија неговите најблиски, роднини и пријатели, кои со трогателни пораки се простуваат од човекот со големо срце, тивка душа и неизмерен талент.
Мустафа замина прерано, но зад себе остави песни, спомени и трага што ќе живее вечно.
Нека почива во мир.