Илинден секогаш буди силни емоции, а годинава фолк-пејачот Спасе Антевски го одбележа на несекојдневен начин. Облечен во духот на македонската традиција, тој се искачи на коњ за да биде дел од празничната атмосфера и да им оддаде почит на илинденците кои ја испишаа најсветлата страница од македонската историја.
Иако многумина очекуваа песна и добро расположение, самиот Спасе низ насмевка призна дека стравот од јавањето си го направил своето. Додека бил на коњот, од возбуда и трема успеал да ја „испомеша“ песната, предизвикувајќи насмевки кај присутните. Но, како што вели и самиот, чувството да се биде дел од илинденската атмосфера било многу посилно од секој страв.
„Најважно е што го почувствував духот на Илинден. Тоа е ден кога секој Македонец треба со гордост да се сети на нашите предци, на нивната жртва и на љубовта кон татковината“, порачува Антевски.
https://www.youtube.com/shorts/gZE1jmxZeiI
Покрај празничните активности, популарниот фолк-пејач не запира ниту на музички план. Во моментов активно го снима видеоспотот за својата најнова песна „Машко срце“, која наскоро ќе ја претстави пред публиката. Според најавите, станува збор за динамична и емотивна композиција, придружена со модерен видеоспот што ќе ја збогати неговата музичка кариера.
Спасе Антевски со години останува доследен на македонската народна песна, негувајќи ја традицијата и културното наследство. А токму Илинден уште еднаш потсети дека љубовта кон Македонија не се мери со совршено отпеана строфа, туку со искреното чувство, почитта кон историјата и гордоста што ја носиме во срцето.
Нека ни е вечен Илинден – симбол на слободата, достоинството и непокорот на македонскиот народ.