Скопје беше сведок на еден навистина спектакуларен и редок музички настан. Во свечената сала на Македонската опера и балет, Елена Андоновска го одржа својот долгонајавуван голем солистички концерт под наслов „Запеало славеј пиле“, концерт кој според многумина веќе се вбројува меѓу најдобрите и најкултурни фолк концерти некогаш одржани во Македонија.
Од првиот до последниот тон, публиката беше поведена на незаборавен музички патоказ низ времето, каде се испреплетоа македонската традиционална, етно и новосоздадена народна музика. Со искрена емоција, достоинствен настап и извонредна вокална интерпретација, Елена Андоновска уште еднаш потврди дека припаѓа на врвот на македонската музичка сцена.
Концертот беше збогатен со музичко-сценски перформанс со повеќе од триесет музичари и артисти на сцената, врвен оркестар, прецизна режија, впечатлива сценографија, внимателно одбран стајлинг и светлечки ефекти кои ја надополнија целокупната приказна без да ја засенат – туку напротив, да ѝ дадат дополнителна длабочина и елеганција.
Веднаш по концертот, социјалните мрежи беа преплавени со фотографии, видеа и пофалби, а честитките пристигнаа и од бројни нејзини колеги и музички професионалци. Многумина едногласно оценија дека станува збор за концерт со високи естетски стандарди, културна мерка и уметничка зрелост – пример како треба да изгледа еден современ фолк-спектакл.
Елена Андоновска со овој концерт покажа дека фолк музиката може да биде достоинствена, автентична и современа, без да ја изгуби својата традиционална душа. „Запеало славеј пиле“ не беше само концерт – беше музичка исповед, културен настан и уметничка лекција, која долго ќе се памети.
Со вакви проекти, Андоновска јасно го поставува летвото високо и испраќа порака дека македонската музика има иднина кога е создадена со љубов, почит и визија.